Crearemos unha Oficina Municipal da Vivenda que xestionará o Patrimonio Municipal do Solo, promoverá cooperativas de vivendas e de vivendas de promoción pública e ofrecerá asesoramento das axudas de rehabilitación.
Temos o reto de colocar máis de 10.000 árbores nos espazos públicos que estarán inventariados no Catálogo Verde de Tomiño. O noso obxectivo será ter máis árbores que puntos de luz!
Impulsaremos a Estratexia Municipal do Ciclo da Auga 2030, que catalogará os recursos hídricos de Tomiño apostando pola autoxestión das traídas de augas e a creación de colectores de saneamento e zonas de depuración comunitaria e individual.
A actividade cultural conectarase coas das entidades culturais das parroquias e os novos espazos a recuperar, como a Casa de Cultura de Tomiño e a Casa do Tempo de Sobrada.
Seguiremos tecendo amizade con Vila Nova de Cerveira impulsando as iniciativas da Eurocidade e o AECT Rio Minho e situando ao territorio no centro da Eurorrexión, co gran reto de crear o primeiro parque urbano transfronteirizo de Europa coa pasarela peonil no Parque da Amizade.
Situaremos ao noso concello como polo tractor dun turismo de calidade e respectuoso coa contorna. Impulsaremos a recuperación da variante do Camiño da Nosa Señora do Norte e potenciaremos o Parque da Amizade.
Queremos crear un amplo parque público no centro do Seixo, un pulmón verde de referencia no concello, no que contaremos con espazos de lecer, áreas deportivas e de esparexemento.
Queremos que en 2030 Tomiño sexa o primeiro concello en eliminar as barreiras arquitectónicas dos espazos e edificios municipais. Estableceranse liñas de axudas para facer un Tomiño accesíbel cohesionador, integrador e con visión de xénero.
Empregaremos a nosa longa historia vencellada a persoeiros da arte e da cultura
para situarnos como concello referente do talento e a creatividade. Crearemos un espazo coworking e impulsaremos accións innovadoras para o seu fomento
Somos o concello con máis quilómetros de río Miño, unha identidade a preservar. O reto é conectar e mellorar os itinerarios ciclábeis, que conformarán itinerarios xerais como o Anel Verde do Río Miño, a rede de cicloturismo Eurovelo…
Fomentaremos itinerarios peonís e favoreceremos o deporte de base para todos os nenos e nenas. Temos como reto a creación de novas instalacións deportivas
vencelladas ao río e apoiaremos a inclusión fomentando deportes menos coñecidos.
Queremos situar a Tomiño como un concello que garante servizos públicos que dependen doutras administracións. Defenderemos que a Xunta atenda as súas obrigas tanto na sanidade pública como na atención ás escolas, no transporte e na mobilidade.
Apostaremos por ser un concello modelo na convivencia do noso sector agrícola coas zonas residenciais. Crearemos unha mesa de traballo para deseñar unha estratexia de desenvolvemento agrícola e sotibilidade ambiental e fomentaremos o comercio local de proximidade.
Daremos un novo impulso á participación veciñal en todos os eidos. Alén do Concello Escoita e do grupo de participación xuvenil Voces Novas, constituiremos os Consellos Parroquiais para atender ás súas necesidades en colaboración coas asociacións existentes.
